KNLA တပ်မတော်ရဲ့ စစ်ဦးစီးဒုတိယတန်း ဗိုလ်မှူးကြီးမိုးဖြူ ကွယ်လွန်

သတင်းနှင့် ဓာတ်ပုံ - မြနှယ်စိမ်းစိမ်း (အင်းစိန်) မေလ ၁၂ ရက်၊ ၂၀၁၂ ခုနှစ်

မြန်မာနိုင်ငံကနေ စီးပွားရေးဘာသာရပ်နဲ့ ဘွဲ့ရရှိခဲ့ပြီး ၁၉၇၀ ၀န်းကျင်ကာလမှာ ကရင့်တော်လှန်ရေးထဲ ၀င်ရောက်ခဲ့သူ မွန်ပြည်နယ် ဘီးလင်းနယ်သား ဗိုလ်မှူးကြီးမိုးဖြူဟာ မနေ့ မွန်းလွဲပိုင်းက ထိုင်း-မြန်မာနယ်စပ် မဲဆောက်မြို့ မဲဆောက်ရမ် ပုဂ္ဂလိကဆေးရုံမှာ ဆီးချိုရောဂါနဲ့ ကွယ်လွန်သွားခဲ့ပါတယ်။ သာမန်စစ်သည်တဦးအဖြစ်နဲ့ ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ ၁ ကနေ ကရင်တော်လှန်ရေးထဲ စတင်ဝင်ရောက်ခဲ့တဲ့ စောမိုးဖြူဟာ ကွယ်လွန်ချိန်မှာ KNLA တပ်မတော်ရဲ့ စစ်ဦးစီးဒုတိယတန်း (G-2) ဗိုလ်မှူးကြီးမိုးဖြူ တာဝန်ကို ထမ်းဆောင်နေဆဲဖြစ်ပါတယ်။ ဘီးလင်းမြို့နယ် ကြိုးဝိုင်းရွာသားဖြစ်တဲ့ ဗိုလ်မှူးကြီးမိုးဖြူဟာ ကရင်အမျိုးသားအစည်းအရုံးရဲ့ တာဝန်ပေးအပ်ချက်အရ မြန်မာအစိုးရနဲ့ သွားရောက်ဆွေးနွေးခဲ့တဲ့ KNU ငြိမ်းချမ်းရေးအဖွဲ့နဲ့ အရင်လ ၄ ရက်ကနေ ၁၁ ရက်နေ့အထိ ရန်ကုန်နဲ့ နေပြည်တော်ကို သွားရောက်ခဲ့တဲ့ အဖွဲ့ဝင်တဦးလည်း ဖြစ်ပါတယ်။ လက်ရှိ KNU သစ်တောဌာနတာဝန်ခံ ပဒိုစောအားတိုး ပြောတာက စောမိုးဖြူရဲ့အဖိုးဟာ တချိန်က ဘီးလင်းနယ်မှာ ဘုံဘေဘားမားသစ်ကုမ္ပဏီနဲ့ သစ်လုပ်ငန်းပြိုင်လုပ်ခဲ့တဲ့ သူဌေးကြီး ဦးဖိုးထင်လို့ လူသိများခဲ့ကြောင်း၊ မျိုးရိုးစဉ်ဆက်ချမ်းသာကြပြီး စောမိုးဖြူနှင့် မွေးချင်း ၃ ဦးမှာလည်း ခေတ်ပညာတတ်များဖြစ်ကြောင်း၊ တော်လှန်ရေးထဲမှာလည်း မောက်မာကြွားဝါခြင်းမရှိဘဲ သာမန်ရဲဘော်တဦးလို ကျင့်ကြံနေထိုင်ခဲ့တဲ့ တပ်မှူးတဦးဖြစ်တဲ့အတွက် သူကျဆုံးခြင်းဟာ ကရင်တော်လှန်ရေးအတွက် ကြီးမားတဲ့ ဆုံးရှုံးမှုတရပ်ဖြစ်တယ်လို့ ဆိုပါတယ်။ ကွယ်လွန်ချိန်မှာ အသက် ၆၂ နှစ်ရှိပြီဖြစ်တဲ့ စောမိုးဖြူရဲ့ ရုပ်ကလာပ်ကို KNLA တပ်မဟာ ၇ မှာရှိတဲ့ သေဘေထာ့စခန်းမှာ ထားရှိပြီး လာမယ့် တနင်္လာနေ့မှာ စစ်အခမ်းအနားနဲ့ သူ့ရဲ့ဈာပနကို ကျင်းပမှာ ဖြစ်တယ်လို့ တာဝန်ရှိသူတွေက ပြောပါတယ်။

KNU ငြိမ်းချမ်းရေးကိုယ်စားလှယ်အဖွဲ့ဝင်အချို့နှင့် စောမိုးဖြူ (ယာအစွန်)

(ဆက်ဖတ်ရန်...................)

ဖတ်ပြီးပြန်ခေါက်သိမ်းပေးခဲ့ပါ...

အပြန်အလှန် တိုက်ခိုက်မှုမျိုး မရှိဘဲ ထိုင်းစွပ်စွဲမှုကို DKBA ဆက်လက်တုန့်ပြန်သွားမည်

မေလ ၁၁ရက်၊ ၂၀၁၂ ခုနှစ်။ နန်းသူးလေ (ကေအိုင်စီ) ထိုင်းအစိုးရက ဗိုလ်ချုပ်စောလားပွယ်အား မူးယစ်ရာဇာအဖြစ် စွပ်စွဲပြောဆိုမှုများ ရပ်ဆိုင်းသွားခြင်းမရှိပဲ အခြေအနေ ဆက်လက် တင်းမာ ပါက ဒေသခံလူထုကို ထိခိုက်စေမည့် တိုက်ခိုက်မှုမျိုး မရှိအောင် ဆက်လက်တုန့်ပြန်သွားမည်ဟု တိုးတက်သောဗုဒ္ဓဘာသာ ကရင်အမျိုး သားတပ်မတော်(DKBA)က ပြောကြားလိုက်သည်။ DKBA ကလို့ထူးဘောခေါင်းဆောင် ဗိုလ်ချုပ်စောလားပွယ်က ၎င်းအပေါ် ထိုင်းအစိုးရ၏ စွပ်စွဲချက်ကို အတတ်နိုင်ဆုံး ငြိမ်းချမ်းသော နည်းဖြင့် ဆက်လက် ဖြေရှင်းသွားမည်ဟု ယခုလို ကေအိုင်စီသို့ ပြောသည်။ “ကျနော့်အနေနဲ့ ငြိမ်းချမ်းရေးကို လိုလားတယ်။ ပြည်သူလူထုကို ချစ်တယ်။ တိုက်ပွဲတွေကြောင့် ပြည်သူတွေ အများကြီး ဒုက္ခရောက်ကြ တယ်။ အဲဒီအတွက်ကြောင့် အတတ်နိုင်ဆုံး တိုက်ပွဲတွေ မဖြစ်အောင် ဒီပြဿနာကို ဆက်ပြီး ဖြေရှင်းသွားမယ်”ဟု ဆိုသည်။ ယမန်နေ့က မြ၀တီမြို့နယ် ဝေါလေဒေသရှိ ကော်သူးမွဲခီးကျေးရွာ(ဆုံဆည်းမြိုင်)တွင် ပြည်တွင်းပြည်ပ သတင်းထောက် ၅၀ကျော်ကို ခေါ် ယူပြီး ပြုလုပ်ခဲ့သည့် ဒုတိယအကြိမ်မြောက် သတင်းစာရှင်းလင်းပွဲတွင် ထိုသို့ ပြောကြားသွားခဲ့ခြင်းဖြစ်သည်။ DKBA လက်အောက်ခံ ကလို့ထူးဘော ကရင်အမျိုးသားအစည်းအရုံး(KKO) အတွင်းရေးမှူး စောဂုဏ်အောင်ကလည်း “သူတို့ဘက်က မီဒီ ယာနဲ့ပဲ ပြောနေသရွေ့ ကျနော်တို့က မီဒီယာနဲ့ပဲ တုန့်ပြန်ဖို့ အစီအစဉ်ရှိပါတယ်။ သူတို့ဘက်က တစုံတရာ ကိုယ်ထိလက်ရောက် မကျူး လွန်သရွေ့ ကျနော်တို့ ဒီဘက်က ကိုယ်ထိလက်ရောက် လွန်ကျူးဖို့ လုံးဝ အစီစဉ်မရှိပါဘူး။”ဟု ဖြည့်စွက်ပြောဆိုသည်။ တဆက်တည်း၌ပင် ထိုင်းဒု-၀န်ကြီးချုပ် ချရုမ်ယူဘန်းရူး ဦးဆောင်သည့် ထိုင်းနိုင်ငံ မူးယစ်ဆေး ထိန်းချုပ်ရေးဘုတ်အဖွဲ့ရုံး-ONCB ၏ ထုတ်ပြန်သည့် မူးယစ်ရာဇာ ၂၅ဦး အမည်စာရင်းနှင့် ပတ်သက်၍ ဗိုလ်ချုပ်စောလားပွယ်က ၎င်းအနေဖြင့် မူးယစ်ရောင်းဝယ်ခြင်း၊ သုံးစွဲ ခြင်း၊ အခြားသူများအား ရောင်းဝယ်ရန် ခိုင်းစေခဲ့ခြင်း လုံးဝ မရှိခဲ့ကြောင်း သတင်းထောက်များအား ပြောကြားခဲ့သည်။ “ကျနော်ဟာ မြန်မာနိုင်ငံသားဖြစ်ပါတယ်။ ထိုင်းနိုင်ငံဘက်ကို သွားအစစ်ဆေးခံဖို့ဆိုတာ မဖြစ်နိုင်ဘူး။ ကျနော့်နိုင်ငံထဲမှာ လာမေးမြန်း မယ်ဆိုရင်တော့ ဖြစ်နိုင်တယ်။ ကျနော်တို့နိုင်ငံမှာလဲ မူးယစ်ဆေးဝါးတိုက်ဖျက်ရေးအဖွဲ့ ရှိပါတယ်။ ထိုင်းမှာလည်း ရှိတယ်။ ကျနော်တို့ နှစ် နိုင်ငံ ပူးပေါင်းပြီး တွေ့ဆုံမေးမြန်းကြမယ်ဆိုရင်တော့ ဖြစ်နိုင်ပါတယ်။”ဟု ၎င်းက ပြောသည်။ ယင်းရှင်းလင်းပွဲသို့ သတင်းထောက်များ အပါအ၀င် KNU-KNLA ကရင်ငြိမ်းချမ်းရေးကောင်စီ၊ သျှမ်းပြည်လူမျိုးပေါင်းစုံ ပြည်သူ့လွတ် မြောက်ရေးအဖွဲ့(ရလလဖ)၊ လွတ်လပ်သော အလုပ်သမားသမဂ္ဂ ဖြစ်မြောက်ရေး ကော်မတီဝင်မှ ကိုယ်စားလှယ်များနှင့် လူထု စုစုပေါင်း ပရိဿတ် ၂၀၀ကျော် တက်ရောက်ခဲ့သည်။ DKBA ကို ထောက်ခံသည့်အနေဖြင့် သတင်းစာရှင်းလင်းပွဲ တက်ရောက်လာသည့် KNU-KNLA၊ ရလလဖနှင့် ဒေသခံလူများက ဗိုလ်ချုပ် စောလားပွယ်သည် မူးယစ်ဆေးကိစ္စနှင့် ပတ်သက်ခြင်း မရှိသည်မှာ ယုံကြည်ကြောင်း ပြောဆိုခဲ့ကြသည်။ ပြည်တွင်းသတင်းထောက်တစ်ဦးကလည်း “ဒီလိုမျိုး သတင်းစာရှင်းလင်းပွဲလုပ်တဲ့အတွက် ၅၀%လောက်ပဲ အောင်မြင်မှုရမယ်လို့ မြင် တယ်။ ဘာကြောင့်လဲဆိုတော့ သက်ဆိုင်ရာ အာဏာပိုင်အဖွဲ့အစည်းတွေလာရောက် ရှင်းလင်းကြမှပဲ အောင်မြင်မယ်လို့ ထင်တယ်”ဟု ၎င်း၏အမြင်ကို ပြောဆိုခဲ့သည်။ ဗိုလ်ချုပ်စောလားပွယ်သည် ထိုင်းအစိုးရ၏ စွပ်စွဲမှုကို ဖြေရှင်းလိုသည့် ရည်ရွယ်ချက်ဖြင့် မေလ ၁ရက်နေ့က ပထမတစ်ကြိမ် သတင်းစာ ရှင်းလင်းပွဲ ပြုလုပ်ခဲ့ပြီး ထပ်မံ ဖြည့်စွက်ပြောဆိုသွားရန်အတွက် မြန်မာပြည်တွင်းမီဒီယာများ၊ ပြည်ပရောက် မြန်မာမီဒီယာများနှင့် ထိုင်း သတင်းထောက်များကို ဖိတ်ကြားကာ ဒုတိယအကြိမ် သတင်းစာရှင်းလင်းပွဲကို ပြုလုပ်ခဲ့ခြင်းဖြစ်သည်။ http://www.kicnews.org/?p=11409

(ဆက်ဖတ်ရန်...................)

ဖတ်ပြီးပြန်ခေါက်သိမ်းပေးခဲ့ပါ...

KNLA ဒုတိယတန်း စစ်ဦးစီးမှူး ဗိုလ်မှူးကြီးမိုးဖြူ ကွယ်လွန်

ကရင်အမျိုးသားလွတ်မြောက်ရေးတပ်မတော်-KNLA ၏ စစ်ဦးစီးမှူး ဒုတိယတန်းအဆင့်ရှိသူ ဗိုလ်မှူးကြီးစောမိုးဖြူ ၆၂နှစ်သည် ယနေ့မွန်း လွဲ ၁း၄၅နာရီအချိန်တွင် ဆီးချိုရောဂါဖြင့် ထိုင်း-မြန်မာနယ်စပ်တနေရာ၌ ကွယ်လွန်သွားခဲ့သည်။ KNLA မှ စစ်ဦးစီးမှူး တတိယတန်း(G-3) ဗိုလ်မှူးတာမလာသောက “G-2 ဗိုလ်မိုးဟာ ရိုးသားတယ်။ ကြိုးစားတယ်။ တာဝန်သိတယ်။ ရဲဘော်တွေကို အထက်အောက် မခွဲခြားဘဲ ဆက်ဆံတတ်တဲ့သူ ဖြစ်တယ်။”ဟု ကေအိုင်စီသို့ ပြောသည်။ သူသည် မွေးချင်းမောင်နှမ သုံးဦးအနက် ဒုတိယမြောက်ဖြစ်သလို မိဘမျိုးရိုးမှာ ငွေကြေးချမ်းသာသူများဖြစ်ကြောင်းကို ငယ်စဉ်က ကျောင်းနေဖက် ဖြစ်ခဲ့သူ ကရင်အမျိုးသမီးအစည်းအရုံးမှ ကျန်းမာရေးတာဝန်ခံ နော်မြိုင်ဖိုးက ယခုလို ပြောသည်။ “သူ့မှာ အမနဲ့ညီမ ရှိတယ်။ ကျောင်းပြီးတာနဲ့ တော်လှန်ရေးထဲကို သူ တခါတည်း ၀င်လုပ်လိုက်တာနဲ့ သူ့အမ အင်ဂျင်နီယာဆို အလုပ်ပါ ပြုတ်သွားတယ်။ သူ့မောင် တောခိုလို့လေ”ဟု ဆိုသည်။ ဗိုလ်မှူးကြီးမိုးဖြူသည် မွန်ပြည်နယ်၊ ဘီးလင်းမြို့နယ် ကြိုးဝိုင်းရွာသားဖြစ်ပြီး ခန့်မှန်းခြေအားဖြင့် ၁၉၇၀ခုနှစ်နောက်ပိုင်းတွင် ကရင့်တော် လှန်ရေးသို့ KNU သထုံခရိုင်၊ တပ်မဟာ(၁)မှ စတင် ၀င်ရောက်ခဲ့သည်။ စီးပွားရေးပညာဖြင့် ဘွဲ့ရရှိခဲ့သူ ဗိုလ်မှူးကြီးမိုးဖြူသည် ပြီးခဲ့သည့် ဧပြီလ ၄ရက်နေ့မှ ၁၁ရက်နေ့အထိ မြန်မာအစိုးရနှင့် ပြည်ထောင်စုအ ဆင့် သွားရောက်ဆွေးနွေးခဲ့သည့် ကရင်အမျိုးသားအစည်းအရုံး-KNU ငြိမ်းချမ်းရေး ကိုယ်စားလှယ်အဖွဲ့ထဲတွင် ပါဝင်ခဲ့သူဖြစ်သည်။ ၎င်း၏ဈာပနကို ကေအဲန်ယူ ထိန်းချုပ်နယ်မြေတစ်ခုဖြစ်သည့် တပ်မဟာ(၇)နယ်မြေတွင် လာမည့် တနင်္လာနေ့ (မေလ ၁၄ရက်နေ့)တွင် ပြုလုပ်ပေးသွားမည်ဟု ကေအဲန်ယူအသိုင်းအ၀ိုင်းထံမှ သိရသည်။ http://www.kicnews.org/?p=11414

(ဆက်ဖတ်ရန်...................)

ဖတ်ပြီးပြန်ခေါက်သိမ်းပေးခဲ့ပါ...

မူးယစ်ရာဇာလို့ ထိုင်းအစိုးရက ဆုကြေးထုတ်ထားတဲ့ကိစ္စ ဗိုလ်ချုပ်စောလားပွယ် ဌာနချုပ်မှာ သတင်းစာရှင်းလင်းပွဲ ထပ်မံပြုလုပ်

မူးယစ်ရာဇာလို့ ထိုင်းအစိုးရက ဆုကြေးထုတ်ထားတဲ့ကိစ္စ ဗိုလ်ချုပ်စောလားပွယ် ဌာနချုပ်မှာ သတင်းစာရှင်းလင်းပွဲ ထပ်မံပြုလုပ် ဓာတ်ပုံသတင်း - မြနှယ်စိမ်းစိမ်း (အင်းစိန်) မေလ ၁၀ ရက်၊ ၂၀၁၂ ခုနှစ် တိုးတက်သော ဗုဒ္ဓဘာသာ ကရင်အမျိုးသားတပ်မတော် DKBA ကလို့ထူးဘောအဖွဲ့က စစ်ဦးစီးချုပ် ဗိုလ်ချုပ် စောလားပွယ်က ထိုင်းအစိုးရ စွပ်စွဲပြောဆိုသလို သူဟာ မူးယစ်ဆေးဝါးရာဇာ မဟုတ်တဲ့အကြောင်းကို နိုင်ငံတကာက ပိုမိုသိရှိနိုင်ဖို့အတွက် ဒီနေ့ ကရင်ပြည်နယ် မြ၀တီခရိုင်မှာရှိတဲ့ ဌာနချုပ်မှာ သတင်းစာရှင်းလင်းပွဲ ထပ်မံပြုလုပ်ပြီး ထိုင်းအစိုးရကို တုံ့ပြန်ပြောဆိုလိုက်ပါတယ်။ သူပြောတာက ထိုင်းအစိုးရဟာ လွန်ခဲ့တဲ့ ၉ နှစ်လောက်က ထိုင်းမှာ ဖမ်းမိတဲ့ မူးယစ်ဆေးဝါးတွေကို အခုမှ ဘာလို့ သူ့ကို စွပ်စွဲရတာလည်း ထိုင်းအစိုးရဖြစ်စေ၊ မြန်မာအစိုးရဖြစ်စေ နိုင်ငံတကာက မူးယစ်ဆေးဝါး တိုက်ဖျက်ရေးအဖွဲ့တွေဖြစ်စေ သူ့နေရာဒေသမှာ အချိန်မရွေး လာရောက်စစ်ဆေးနိုင်ကြောင်း ထိုင်းနဲ့ မြန်မာ သတင်းထောက် ၅၀ ကျော်ကို ဒီနေ့မှာ ရှင်းလင်းပြောကြားခဲ့ပါတယ်။ သူဆက်ပြောတာက ဘာအထောက်အထားမှမရှိဘဲ DKBA က မြန်မာအစိုးရနဲ့ ပေါင်းပြီး ဒေသဖွံ့ဖြိုးရေး လုပ်နေတဲ့အချိန်မှာ ဒီလိုစွပ်စွဲတာ မရိုးသားဘူးလို့ ပြောပြီး ထိုင်းဒု-၀န်ကြီးချုပ် ချလုံယူဘမ်းရုန်းအနေနဲ့ သူ့ကို ဖမ်းဆီးဖို့ အမိန့်ထုတ်ပြီး ပြည်ပမှာ ထွက်ပြေးနေတဲ့ ၀ရမ်းပြေး ထိုင်းဝန်ကြီးချုပ်ဟောင်း ထပ်ဆင်ချင်န၀ပ် ကိုကျတော့ ဘာလို့ မဖမ်းတာလဲဆိုပြီး မေးခွန်းထုတ်ခဲ့ပါတယ်။ ထိုင်းနိုင်ငံ ဒု-၀န်ကြီးချုပ် ချလုံယူဘမ်းရုန်း ဦးဆောင်တဲ့ ထိုင်းနိုင်ငံ မူးယစ်ဆေးထိန်းချုပ်ရးဘုတ်အဖွဲ့ရုံး (ONCB) ကနေ အရင်လ ၂၀ ရက်နေ့က ထုတ်ပြန်ခဲ့တဲ့ ထိုင်းက အလိုရှိတဲ့ မူးယစ်ရာဇာ ၂၅ ဦး စာရင်းမှာ စောလားပွယ် ပါရှိပြီး သူ့ကို ထိုင်းဘတ်ငွေ ၁၂ သန်း ဆုကြေးထုတ်ထားပါတယ်။ ထိုင်းဘက်က ပြောတာက ၂၀၀၃ ခုနှစ်က DKBA ကလို့ထူးဘောဒေသ ဝေါ်လေရွာ ထိုင်းဘက်ခြမ်းမှာ ထိုင်းဘက်က ပိုင်ရှင်မဲ့ မူးယစ်စိတ်ကြွဆေးပြား (ရာဘ) အလုံးရေ ၉.၄ သန်း ဖမ်းဆီးရရှိမှုနဲ့ ဆုငွေထုတ်တာလို့ ဆိုပါတယ်။ ထိုင်းဒု-၀န်ကြီးချုပ်ကတော့ စောလားပွယ်အနေနဲ့ ထိုင်းမှာ လာရောက် အဖမ်းခံတာကလွဲပြီး အခြားနည်းလမ်းမရှိတဲ့အကြောင်း ပြောဆိုထားပြီး မြန်မာအစိုးရအနေနဲ့ စောလားပွယ်ကို ထိုင်းဘက် လွှဲပြောင်းပေးဖို့ကိုလည်း တောင်းဆိုထားပါတယ်။ DKBA အဖွဲ့ရဲ့ ရပ်တည်ရေးနဲ့ ပတ်သက်ပြီး ထိုင်းနဲ့ ရန်ကုန်အခြေစိုက် သတင်းထောက်တွေရဲ့ မေးမြန်းချက်တွေကို DKBA အဖွဲ့က ရှင်းပြတာက အဖွဲ့ရန်ပုံငွေကို သတ္တုတူးဖော်ရေးလုပ်ငန်း၊ ကုပ္မဏီလုပ်ငန်း၊ မော်တော်ယာဉ်လိုင်းပြေးဆွဲတဲ့လုပ်ငန်း၊ စိုက်ပျိုးမွေးမြူရေးလုပ်ငန်းတွေနဲ့ ရပ်တည်နေပါတယ်လို့ ဆိုပါတယ်။ စောလားပွယ် (နှုတ်ခမ်းမွေး) ပြောတာက သူ့ကို စွပ်စွဲတဲ့ကိစ္စနဲ့ပတ်သက်ပြီး အချိန်မရွေး ဖြေရှင်းနိုင်ပြီး ဘယ်နိုင်ငံတကာအဖွဲ့အစည်းမဆို သူ့ကို လာရောက် စစ်ဆေးနိုင်ပါတယ်လို့ သတင်းထောက်တွေကို ဆိုပါတယ်။ ထိုင်းနယ်စပ်မှာလုပ်တဲ့ ဒီနေ့သတင်းစာရှင်းလင်းပွဲကို ရန်ကုန်အခြစိုက် မြန်မာသတင်းဌာနအသီးသီးက သတင်းထောက် ၄၂ ဦး တက်ရောက်လာတာကို မြန်မာအစိုးရက တစုံတရာ ပိတ်ပင်မှုတွေ ပြုလုပ်တာမရှိဘူးလို့ ၀ါရင့်သတင်းထောက်တဦးက ပြောပါတယ်။ ထိုင်းနဲ့ မြန်မာ နိုင်ငံရေးအကဲခတ်တွေရဲ့ အဆိုအရ ဒီကိစ္စကို အမြန်ဆုံး မဖြေရှင်းနိုင်ဘူးဆိုရင် ရေရှည်မှာ ထိုင်းနဲ့ မြန်မာ ချစ်ကြည်ရေးကို ထိခိုက်နိုင်တယ်လို့လည်း သုံးသပ်ပြောဆိုနေကြပါတယ်။

(ဆက်ဖတ်ရန်...................)

ဖတ်ပြီးပြန်ခေါက်သိမ်းပေးခဲ့ပါ...

ဓါးစာခံ စောလားပွယ်၊ မြန်မာ့မူးယစ် ထုတ်လုပ်မှုနှင့်နိုင်ငံရေးကစားကွက် (ဆောင်းပါး)

ဖူးဒို (မေလ ၇ရက်၊ ၂၀၁၂)

ကမ္ဘာ့ဘိန်းဖြူထုတ်လုပ်မှုပြဇယား
 မြန်မာနိုင်ငံသည် ကမ္ဘာပေါ်တွင်ဘိန်းဖြူထုတ်လုပ်မှု ပမာဏတွင် ဒုတိယအများဆုံးဖြစ်နေပါသည်။ ကမ္ဘာ့ ကုလသမဂ္ဂမူးယစ်နှင့် ရာဇ၀တ် ဌာန၏ ထုတ်ပြန်ချက်အရ မြန်မာနိုင်ငံ၏ ၂၀၁၀ ဘိန်းဖြူထုတ်လုပ်သည့် ပမာဏသည် မက်ထရစ်တန် ၅၈၀ ရှိခဲ့ပါသည်။ဘိန်းစိုက်ပျိုး သည့် ဧရိယာအကျယ်အ၀န်းမှာ၂၀၀၉ခုနှစ်တွင် ၃၁၇၀၀ဟက်တာမှ ၂၀၁၀ခုနှစ်တွင် ၃၈၁၀၀ဟက်တာသို့ တိုးလာသော်လည်း ၂၀၁၀ခု နှစ် ဘိန်းထွက်နှုံးကျရသည့် အကြောင်းအရင်းမှာ ပိုးမွါးကျရောက်ခြင်းကြောင့် ဖြစ်သည်။

၁၉၉၆မှ ၂၀၁၀ထိ မြန်မာနိုင်ငံ ဘိန်းစိုက်ပျိုးမှုဇယား
 မြန်မာနိုင်ငံတွင် ၁၉၉၆ မှ ၂၀၀၆ ထိ ဘိန်းစိုက်ပျိုးမှု သိသိသာသာ ကျဆင်းခဲ့သော်လည်း ထိုကာလတွင်း စိတ်ကြွရူးသွပ်ဆေးခေါ် ရာဘ ဆေး ထုတ်လုပ်သည့်ပမာဏမှာ ကမ္ဘာ့ထိပ်တန်းအဆင့် ၁သို့ ရောက်ခဲ့ပါသည်။ ၂၀၁၀နှစ်ထဲတွင် မြန်မာနိုင်ငံမှ ထိုင်းနိုင်ငံသို့ မှောင်ခို တင်သွင်းခဲ့သော ရာဘဆေး အရေအတွက်မှာ ၁ ဘီလျံ (သန်း တစ်ထောင်) ရှိခဲ့ပြီး ၂၀၁၀အတွင်း ဖမ်းဆီးမိခဲ့သည့်အရေအတွက်မှာ သန်း ၄၀ ရှိခဲ့ပါသည်။ မြန်မာနိုင်ငံမှာထွက်ရှိသည့် ရာဘဆေးအများစုသည် ထိုင်း၊ လာအိုနှင့် တရုတ်နိုင်ငံသို့ မှောင်ခိုတင်သွင်းလေ့ရှိ ခဲ့ရာမှ ယခုအချိန်တွင် နယ်စပ်မှတဆင့် ဘင်္ဂလားဒေ့ရ်ှနှင့် အိန္ဒိယကိုပါ တင်သွင်းလာပြီ ဖြစ်သည်။

ကုလသမဂ္ဂ (UNOD) မှ ထုတ်ပြန်သည့် မြန်မာနိုင်ငံတွင်း ဒေသအလိုက် ဘိန်းစိုက်ပျိုးမှုဇယား
 ၂၀၁၀ တွင် မြန်မာနိုင်ငံတွင်းရှိ စိတ်ကြွရူးသွပ်ဆေး (ရာဘ)နှင့် ဘိန်းဖြူ ဖမ်းဆီးရမိသည့် ကိန်းဂဏာန်း သိသိသာသာ ကျဆင်းခဲ့ပါသည်။ သို့သော် ၎င်းကျဆင်းနှုံးသည် ရာဘနှင့် ဘိန်းဖြူထုတ်လုပ်ခြင်း ကျဆင်းသည့်လဏ္ခာမဟုတ်ဘဲ ၂၀၁၀ ရွေးကောက်ပွဲအတွက် ပြင်ဆင် ခြင်း၊ စည်းရုံးခြင်းနှင့် တိုက်ရိုက် ပတ်သက်နေပါသည်။ အချို့သော် ကိုယ်စားလှယ်များ၏ ရွေးကောက်ပွဲစည်းရုံးရေးတွင် မိမိပါတီအနိုင်ရပါ က ဘိန်းစိုက်ပျိုးရေးကို ခွင့်ပြုမည်ဟုဆိုသော စည်းရုံးရေးကို တွေ့ခဲ့ရသလို မူးယစ်ကုန်သည်တချို့သည်လည်း လွှတ်တော်တွင်းသို့ ရောက်ရှိနေပါပြီ။ နောက် သက်သေတခုမှာ ကမ္ဘာ့ထိပ်တန်း မူးယစ်ရာဇာများဖြစ်သော ခွန်ဆာ၊ လောဝ်စစ်ဟန်၏သား ထွန်းမြင့်နိုင် (Steven Law) တို့ကို တွေ့ရပါသည်။ မူးယစ်ကုန်သည်ဖြစ်နေပါစေ တနေ့တချိန်တွင် မြန်မာစစ်ဖက် ခေါင်းဆောင်နှင့်တည့်အောင်ပေါင်းပြီး အေးချမ်းစွာ နေနိုင် သည့်အပြင် ရင်းနှီးမြုပ်နှံမှုများ၊ ငွေကြေးခ၀ါချမှု (ငွေမဲမှ ငွေဖြူသို့ ပြောင်းလဲခြင်း)များကို မြန်မာနိုင်ငံတွင် လွတ်လပ်စွာ လုပ်ဆောင်နိုင် သောအချက်သည် ဘိန်းစိုက်ပျိုးမှုနှင့် မူးယစ်ထုတ်လုပ်ခြင်းကို များစွာအားပေးနေပါသည်။ မြန်မာအစိုးရသည် မူးယစ်ဆေး တိုက်ဖျက်ရေးကို သိသိသာသာ မတိုက်ဖျက်ခြင်းအတွက် အဓိကသုံးသပ်မိသော အချက်များမှာ - - တိုင်းရင်းသားလက်နက်ကိုင်အဖွဲ့ကို အပြစ်ဖို့ပြီး စစ်ရေး၊ နိုင်ငံရေး အမြတ်ထုတ်ရန် - ဘိန်းနှင့် မူးယစ်ဆေးထွက်ကုန် အများစုမှာ ပြည်ပဈေးကွက်အတွက်သာ ဖြစ်ခြင်း - အုပ်ချုပ်ရေးအတွင်း မသမာမှု၊ လာဘ်ပေးလာဘ်ယူမှုများ ရှိနေခြင်းကြောင့် ဖြစ်ပါသည်။ ဘိန်းစိုက်ပျိုးမှုနှင့် မူးယစ်ဆေး ထုတ်လုပ်မှု အများအပြားတွင် အစိုးရမှ တာဝန်ရှိနေသူများ ပတ်သက်နေသလို အချို့ဒေသများတွင် စိုက် ပျိုးရေးနှင့်ပတ်သက်ပြီး ဘိန်းစိုက်ပျိုးရန် အာဏာပိုင်များမှ အားပေးနေသည်ကို တွေ့ရပါသည်။ သက်သေအနေဖြင့် လူနေကျဲသော ချင်းတောင်တန်းများတွင် မြို့နယ်အာဏာပိုင်များက မြို့ပြင်များတွင် ဘိန်းစိုက်ပျိုးခွင့် ပေးထားသည်ကို တွေ့ရပါသည်။ ဒီ့အပြင် ဘိန်းနှင့် မူးယစ်ဆေးဖမ်းဆီးရမိပြီး မီးရှို့ဖျက်ဆီးသည့် အခမ်းအနားလုပ်ရန် အာဏာပိုင်များသည် မူးယစ်ကုန်သည်များကို တိုက်ရိုက်ဆက်သွယ် ပြီး အလူခံလေ့ရှိနေသည်မှာလည်း လုပ်ရိုးလုပ်စဉ်တစ်ခု ဖြစ်လာခဲ့ပါပြီ။ ထို့ကြောင့် မြန်မာနိုင်ငံ၏ ဘိန်းနှင့် မူးယစ်ဆေးထွက်ရှိခြင်း၏ အဓိကရေသောက်မြစ်မှာ အုပ်ချုပ်ရေးတွင် တာဝန်ရှိသော အာဏာပိုင်များ နှင့် အဓိကပင်စည်မှာ ဘိန်းနှင့် မူးယစ်ဆေး အများအပြား ထုတ်လုပ်သည့် မူးယစ်ရာဇာများ ဖြစ်နေပါသည်။

ထိုင်း-မြန်မာဆက်ဆံရေး
 မြန်မာနှင့် ကီလိုမီတာ ၁၂၀၀ကျော် နယ်စပ်ထိနေသည့် ထိုင်းနိုင်ငံသည် မြန်မာနိုင်ငံတွင်း စီမံကိန်း ၆၁ခုဖြင့် ရင်းနှီးမြုပ်နှံငွေ အမေရိကန် ဒေါ်လာ ၉.၅၆၈ဘီလီလျံဖြင့် မြန်မာနိုင်ငံအတွက် ဒုတိယ အကြီးဆုံး ရင်းနှီးမြုပ်ထားသော နိုင်ငံဖြစ်ပါသည်။ မြ၀တီ-မဲဆောက် နယ်စပ် ကုန်သွယ်တခုတည်းတွင် ကုန်သွယ်မှုပမာဏ တစ်နှစ်လျှင် ဒေါ်လာ သန်းတစ်ထောင်ကျော် ရှိပါသည်။ မြ၀တီ-မဲဆောက်နယ်စပ်ကုန် သွယ်ရေးတံတားကို မြန်မာအစိုးရဖက်က ၂၀၁၀၊ ဇူလိုင်လ ၁၈ရက်မှစပြီး တနှစ်ခွဲနီးပါးကြာ ပိတ်ထားခဲ့ပါသည်။ ၎င်းနယ်စပ် ကုန်သွယ် ရေးလမ်းကြောင်း ပိတ်လိုက်ခြင်းတွက် နေ့စဉ် ကုန်သွယ်မှုပမာဏ ထိုင်းဘတ်ငွေ ၈၈ သန်း ( အမေရိကန် ဒေါ်လာ ၂.၇၄)ကို ထိခိုက်ခဲ့ပြီး နယ်စပ်ဂိတ်ပြန်ဖွင့်နိုင်ရေးတွက် မြန်မာအစိုးရနှင့် အမြန်ဆုံး ဆွေးနွေးမည်ဟု ထိုင်းကုန်သွယ်ရေးဝန်ကြီး ပွန်တီဗာနာကာစိုင် (Mrs. Porn-tiva Nakasai – Minister of Commerce)က ပြောခဲ့ပါသည်။ တကယ်တမ်းတွင်မူ နယ်စပ်ကုန်သွယ်မှုပိတ်ခြင်းကြောင့် နှစ်နိုင်ငံစလုံးမှာ နစ်နာသော်လည်း ထိုင်းနိုင်ငံမှ နယ်စပ်ဖွင့်လှစ်နိုင်ရေးတွက် စိတ်အားထက်သန်နေသည်မှာ ထိုင်းအစိုးရသည် ထိုင်းပြည်သူလူထု၏ နစ် နာမှုများကို အလေးထားသောကြောင့် ဖြစ်သည်။ မဲဆောက်မြို့နှင့် တာ့ခ်ခရိုင် (Tak Province) ဖွံ့ဖြိုးမှုသည် မြ၀တီ-မဲဆောက်ကုန်သွယ် ရေးနှင့် တိုက်ရိုက် ဆက်နွယ်နေပါသည်။ ၂၀၁၀၊ နိုဝင်ဘာလ ရွေးကောက်ပွဲရက်အပြီးတွင် ဗိုလ်နှုတ်ခမ်းမွှေး ဦးဆောင်သော DKBA အဖွဲ့မှ မြ၀တီမြို့သို့ စီးနင်းဝင်ရောက်တိုက်ခိုက် မှုသည် စစ်အစိုးရကို များစွာ သိက္ခာကျစေခဲ့ပါသည်။ လနှင့်ချီကြာသော အစိုးရ၏ တန်ပြန်စစ်ဆင်ရေးကို ဗိုလ်နှုတ်ခမ်းမွှေးတို့အဖွဲ့မှာ ခံနိုင်ရည်ရှိခဲ့သဖြင့် စစ်အစိုးရကို ပိုပြီး သိက္ခာကျစေခဲ့ပါသည်။ ၎င်းနောက် မြ၀တီ-မဲဆောက် နယ်စပ်ဂိတ်ပြန်ဖွင့်ရေးတွင် မြန်မာအစိုးရ ဖက်မှ စစ်ဖက်ဆိုင်ရာ အကျိုးဖြင့် ဆွေးနွေးလာပါသည်။ ဗိုလ်နှုတ်ခမ်းမွေး ဖမ်းဆီးနိုင်ရေးတွင် ထိုင်းအစိုးရမှ ပူးပေါင်းကူညီပြီး ဗိုလ်နှုတ် ခမ်းမွှေးကို ဖမ်းဆီးနိုင်ပြီးနောက်ပိုင်းမှသာ မြ၀တီ-နယ်စပ်ဂိတ်ကို ပြန်ဖွင့်မည်ဟု မြန်မာအစိုးရက တောင်းဆိုလာပါသည်။ သို့သော်လည်း မြန်မာနိုင်ငံအတွင်း၌သာ အခြေစိုက်သော ဗိုလ်နှုတ်ခမ်းမွှေးကို ထိုင်းဖက်မှ ဖမ်းဆီးပေးနိုင်ခြင်းမရှိခဲ့ချေ။ ဧပြီလ ၂၀ရက်နေ့က မူးယစ်ဆေးကုန်ကူးမှုတွင် ထိပ်တန်းစာရင်းဝင်သူ ၂၅ယောက်၏အမည်ကို ဖမ်းဆီးနိုင်သူအား ထိုင်းဘတ်ငွေ ၁၂ သန်း ဆုကြေးငွေပေးမည်ဖြစ်ကြောင်း ထိုင်းအစိုးရ၏ Office of the Narcotics Control Board -ONCB အဖွဲ့က ထုတ်ပြန်ခဲ့သည်။ ထိုစာ ရင်းတွင် မြန်မာနိုင်ငံသား ၃ဦးအနက် DKBA ခွဲထွက်အဖွဲ့ခေါင်းဆောင် ဗိုလ်မှုးချုပ်စောလားပွယ် ခေါ် ဗိုလ်နှုတ်ခမ်းမွှေး၏အမည်လည်းပါ ၀င်ခဲ့သည်။ ထူးခြားချက်တစ်ခုမှာ ဗိုလ်နှုတ်ခမ်းမွှေးတစ်ဦးတည်းသာ ထိုင်းအစိုးရကို ပြန်လည်တုန့်ပြန်ခဲ့ပါသည်။ သူ၏ တုန့်ပြန်ချက်တခု မှာ ထိုင်းအာဏာပိုင်များကို မိမိနယ်ထဲ ၀င်ရောက်စစ်ဆေးရန် ဖိတ်ခေါ်ထားသည်မှာ ထူးခြားချက်တစ်ခု ဖြစ်နေပါသည်။ ၎င်း (ဗိုလ်နှုတ် ခမ်းမွှေး)၏ တုန့်ပြန်ချက်ကို ထိုင်းအာဏာပိုင်မှ ပြန်လည် တုန့်ပြန်သည်မှာ ဗိုလ်နှုတ်ခမ်းမွှေး၏ မူးယစ်ဆေးဝါးမှုသည် လွန်ခဲ့သည့် ၉နှစ်မှ အမှုဖြစ်ပြီး မိမိတို့ဖက်မှ အထောက်အထားရှိသဖြင့် ဗိုလ်နှုတ်ခမ်းမွှေးကိုယ်တိုင် လာရောက်ဖြေရှင်းရန် တောင်းဆိုထားပါသည်။ နှစ်ဦးနှစ်ဖက်၏ အခြေအနေကို လေ့လာပြီး သုံးသပ်မိသည်မှာ - ထိုင်းနိုင်ငံအနေဖြင့် အထောက်ထားမခိုင်လုံဘဲ စွပ်စွဲကြေညာမည်မဟုတ်သလို အထောက်အထားများစွာ ရှိသည့်အထဲမှ တစ်ခုတည်းကို ဆွဲထုတ်ထားသည်မှာ စဉ်းစားစရာဖြစ်နေပါသည်။ ဒိပြင် လွန်ခဲ့သော ၉နှစ်ဆိုသောအချိန် ၂၀၀၃ခုနှစ်သည် ဗိုလ်နှုတ်ခမ်းမွှေးမှ DKBA ၏ အုပ်ချုပ်မှုအောက်တွင်ရှိနေသေးသလို စစ်အစိုးရနှင့် ပူးပေါင်းဆောင်ရွက်နေသည့်ကာလလည်း ဖြစ်နေပါသည်။ ထိုအချိန်ကာလ၏ ပြစ်မှု အတွက် DKBA အဖွဲ့ခေါင်းဆောင် သို့မဟုတ် စစ်ဦးစီးချုပ်ကို ဖြေရှင်းချက် အရင်မတောင်းဘဲ ဗိုလ်နှုတ်ခမ်းမွှေးကို ဖမ်းဝရမ်းထုတ်ခြင်း သည် စိတ်ဝင်စားစရာဖြစ်နေပါသည်။ စာရေးသူအနေနှင့် အတိတ်ကာလတွင် ဗိုလ်နှုတ်ခမ်းမွှေးအနေဖြင့် မူးယစ်ဆေးရောင်းဝယ်မှုနှင့် တိုက်ရိုက်ပတ်သက်မှုရှိမရှိကို အတိအကျ မသိသော်လည်း နှစ်ဦးနှစ်ဖက် စွပ်စွဲချက်နှင့် တုန့်ပြန်ချက်အပေါ် မူတည်ပြီး လေ့လာသော် လက်ရှိတွင် ဗိုလ်နှုတ်ခမ်းမွှေးသည် မူးယစ်ဆေးနှင့် ပတ်သက်မှုကင်းရှင်းကြောင်း ပေါ်လွင်နေပါသည်။ တဖက်တွင်လည်း မြန်မာနိုင်ငံမှ ထွက်သည့် ဘိန်းနှင့် မူးယစ်ဆေးသည် ထိုင်းနိုင်ငံသို့လည်းကောင်း ထိုင်း၊ လာအိုနှင့် တရုတ်နိုင်ငံမှတဆင့် ကမ္ဘာ့ဈေးကွက်သို့ ဖြန့်ဖြူးနေ သည်ကို ထိုင်းအာဏာပိုင်များ တားဆီးလိုသည်မှာလည်း တရားမျှတပြီး သဘာဝကျပါသည်။ အထက်က ဖေါ်ပြသည့်အတိုင်း မြန်မာနိုင်ငံမှထွက်ရှိသည့် ဘိန်းနှင့် မူးယစ်ဆေးသည် မြန်မာနိုင်ငံ အရှေ့မြောက်ပိုင်းဒေသမှ ဖြစ်သည့် အားလျှော်စွာ ဘိန်းနှင့် မူးယစ်ပြဿနာ၏ အဓိကရေသောက်မြစ်နှင့် ပင်စည်ကို ဦးတည်ဖြေရှင်းရန် ပို၍အရေးကြီးသလို မဟာဗျုဟာ လည်း ကျပါသည်။ ထိုင်းနှင့် ကမ္ဘာ့ဈေးကွက်ကို ထိုးဖောက်ဖြန့်ဖြူးနေသော မူးယစ်ရာဇာကြီးများကို ဦးစားပေး ဖမ်းဆီးနိုင်ရန် ပိုကြိုးစား သင့်ပါသည်။ မြန်မာအစိုးရကို ဆန့်ကျင်တိုက်ခိုက်နေသော ဗိုလ်နှုတ်ခမ်းမွှေးကိုသာ ဖမ်းဝရမ်းထုတ်ပြီး မြန်မာအစိုးရနှင့် အဆင်ပြေသော ကမ္ဘာ့အဆင့် မူးယစ်ရာဇာများကို ဖမ်းဆီးရန် မကြိုးစားခြင်းသည် ဘိန်းနှင့် မူးယစ်ဆေးဝါးကို အမှန်တကယ် တိုက်ဖျက်နေခြင်းမဟုတ်ပါ။ မြန်မာအစိုးရမှ ခွင့်ပြုသော မူးယစ်ရောင်းဝယ်သူများကိုသာ ဖမ်းဆီးဝရမ်းထုတ်သော ထိုင်းနိုင်ငံ၏ ပေါ်လစီကိုလည်း အံ့ဩမိသလို သံသ ယ ဖြစ်မိပါသည်။ လက်ရှိတွင် မူးယစ်ရောင်းဝယ်ထုတ်လုပ်မှုမရှိဘဲ မြန်မာအာဏာစနစ်ကို ဆန့်ကျင်နေသော ဗိုလ်နှုတ်ခမ်းမွေးကို ဖမ်းဝ ရမ်းထုတ်ခြင်းသည် မြန်မာအစိုးရ အာဏာရှင်စနစ် သက်တမ်းရှည်ရန် အားပေးရာရောက်သလို ရေသောက်မြစ်နှင့် ပင်စည်ကိုခုတ်ရန် မကြိုးစားဘဲ ခြောက်သွေ့နေသော အကိုင်းအခက်ကို ခုတ်ထွင်ရှင်းလင်းရန် ကြိုးစားခြင်းသည် ပင်စည်ကို ရေလောင်းအကျိုးပေးခြင်း ဖြစ် နေပါသည်။ မူးယစ်ဆေးဝါး တိုက်ဖျက်နေသော ထိုင်းအာဏာပိုင်ကို လေးစားအားပေးသလို တဖက်တွင်လည်း မူးယစ်ဆေးဝါးတိုက်ဖျက်ရေးကဏ္ဍ တွင် မြန်မာအစိုးရ၏ ဩဇာလွမ်းမိုးမှုအောက်မှာ မရပ်တည်သင့်ကြောင်း အကြံပေးလိုပါသည်။

ဖူးဒို
 (မေလ ၇ရက်၊ ၂၀၁၂)
 Reference;
1. UNODC ကုလသမဂ္ဂ မူးယစ်ဆေးဝါးနှင့် ရာဇ၀တ်မှုတိုက်ဖျက်ရေးဌာန
 2. APAIC – အာရှ-ပစိဖိတ်အက်ဖက်တမင်း စိတ်ကြွဆေးသတင်းဌာန
 3. BANGKOK, March 26 (Xinhua)
4. YANGON, Xinhua, 2011-12-7
 မှတ်ချက် # ကေအိုင်စီသို့ ပေးပို့လာသည့် ဤဆောင်းပါးပါ အကြောင်းအရာများသည် ဆောင်းပါးရှင်၏ လေ့လာသုံးသပ်ချက် အာဘော်များသာ ဖြစ်ပါသည်။

(ဆက်ဖတ်ရန်...................)

ဖတ်ပြီးပြန်ခေါက်သိမ်းပေးခဲ့ပါ...

မူးယစ်ဆေးဝါးကိစ္စဗိုလ်ချုပ်စောလား ပွယ် ဖြေရှင်းမှုကို ပြည်တွင်းမီဒီယာများ စိတ်ဝင်စားနေ

မေလ ၇ရက်၊ ၂၀၁၂ခုနှစ်။ နန်းသူးလေ (ကေအိုင်စီ)

ဒီမိုကရေစီအကျိုးပြုကရင်အမျိုးသားတပ်မတော်(DKBA)၏ စစ်ဦးစီးချုပ် ဗိုလ်ချုပ်စောလားပွယ်အနေဖြင့် လာမည့် မေလ ၁၀ရက်နေ့တွင် ဒုတိယအကြိမ် ပြုလုပ်မည့် သတင်းစာရှင်းလင်းပွဲ၌ ထိုင်းအစိုးရ၏ မူးယစ်ရာဇာအဖြစ် စွပ်စွဲခံထားရသည့်အပေါ် မည်သို့ဖြေရှင်းသွားမည် ကို ပြည်တွင်းသတင်းမီဒီယာများမှ အထူး စိတ်ဝင်စားလျှက်ရှိသည်။
ပြည်တွင်းဂျာနယ်တစ်ခု၏ အယ်ဒီတာတစ်ဦးက “သူက ပြည်တွင်းသတင်းထောက်တွေကို ခေါ်ပြီးတော့ ရှင်းတာ အရမ်းထူးတယ်လေ။ အရင်တခါမှ မရှိဖူးဘူး။ ဒါကြောင့် သူ့ရဲ့ မူးယစ်ကိစ္စနဲ့ DKBA သဘောထားတွေကို လက်တွေ့သွားကြည့်ပြီး သတင်းယူဖို့ သွားကြမှာပါ။ ပြည်တွင်းက သတင်းထောက်တွေအနေနဲ့ က DKBA စခန်းကိုသွားပြီး သတင်းယူတာ အလွန်ကိုနည်းပါတယ်။ မရှိသလောက်ပါပဲ။ အဲ့ဒီအ တွက် ဖိတ်ခေါ်တုန်းသွားဖို့ ပိုပြီး ဆန္ဒပြင်းပြကြတာပါ”ဟု ပြောသည်။

“ထိုင်းက ဒုဝန်ကြီးချုပ်ကို သူပြန်ပြီးတော့ တရားစွဲမယ်ဆိုတာတွေပြောနေတော့ အဲဒီအကြောင်းနဲ့ ပတ်သက်ပြီး စိတ်ဝင်စားတယ်။ အခု ကိစ္စက သတင်းတွေမှာတော့ သူမှားတယ်ဆိုပြီး ရေးနေကြတယ်လေ။ အဲဒီတော့ သူ့ဘက်က ဘာပြောမလဲဆိုတာ သိချင်လို့ပါ”ဟု ပြည် တွင်းသတင်းထောက် ကိုဥက္ကာကိုကိုကလည်း ပြောဆိုသည်။

ပြီးခဲ့သည့် မေလ ၁ရက်နေ့က ကရင်ပြည်နယ် မြ၀တီမြို့နယ် ကော်သူးမွဲခီး (ဆုံဆည်းမြိုင်)ရှိ DKBA သင်တန်းခမ်းမတွင် ထိုင်းအစိုးရ၏ မူးယစ်ရာဇာအဖြစ် စွပ်စွဲမှုအပေါ် ဖြေရှင်းသည့် သတင်းစာရှင်းလင်းပွဲ၌ ဗိုလ်ချုပ်စောလားပွယ်က မူးယစ်ဆေးဝါး ရောင်းဝယ်ခြင်းမှန်ပါက အစစ်ဆေးခံမည်ဟုလည်း ပြောဆိုခဲ့ပြီးဖြစ်သည်။
ထိုပွဲသို့ သတင်းထောက် တက်ရောက်မှုနည်းသည့်အပေါ် ပြည်တွင်းလူထုအား ကျယ်ကျယ်ပြန့်ပြန့် သိစေချင်သည့်အတွက် ယခင်နေရာ ၌ပင် သတင်းစာရှင်းလင်းပွဲ ထပ်မံ ပြုလုပ်သွားမည်ဖြစ်ကြောင်းနှင့် ဖိတ်ကြားခံထားရသည့် ပြည်တွင်းသတင်းဌာနများမှ သတင်းထောက် ပေါင်း ၅၀ကျော် တက်ရောက်ကြမည်ဟုလည်း သိရသည်။
ထို့အပြင် ယခု သတင်းစာရှင်းလင်းပွဲသို့ ပြည်တွင်းပြည်ပ သတင်းထောက်များ၊ မူးယစ်ဆေးဝါး တိုက်ဖျက်ရေး အဖွဲ့အစည်းများနှင့် ကရင် အဖွဲ့အစည်းများကိုလည်း ဖိတ်ကြားသွားမည်ဟု ကလို့ထူးဘော ကရင်အစည်းအရုံး-KKO ၏ အထွေထွေ အတွင်းရေးမှူး စောဂုဏ်အောင် က ပြောသည်။
သူက “ကျနော်တို့ရဲ့ ပြောဆိုမှုကို ပြည်သူလူထုဆီ မှန်မှန်ကန်ကန် ရောက်သွားမှာဖြစ်တဲ့အတွက် မီဒီယာတွေလာတာကို အင်မတန်ပဲ ကြိုဆိုပါတယ်။ ကျနော်တို့နေရာမှာလာတဲ့အခါ တချို့က အန္တရာယ်ရှိတယ်တို့ဘာတို့ အမျိုးမျိုး ပြောနေကြတဲ့အပေါ်မှာ ကျနော်တို့အဖွဲ့က လာရောက်တဲ့သူတွေရဲ့ လုံခြုံရေးကို အစစအရာရာ တာဝန်ယူပါတယ်လို့ ပြောချင်ပါတယ်”ဟု ဆိုသည်။
အမည်မဖော်လိုသူ ပြည်တွင်းသတင်းထောက်တစ်ဦးက “လက်နက်ကိုင်အဖွဲ့ရဲ့ ဌာနချုပ်ဆိုတာ သတင်းထောက်တွေ ရောက်ဖူးတဲ့သူ နည်းကြတယ်လေ။ ပြီးတော့ နိုင်ငံတစ်ခုရဲ့ မူးယစ်ရာဇာအဖြစ် သတ်မှတ်တဲ့ကိစ္စက တော်တော်လေး အင်ပက်(သက်ရောက်မှု)ကြီးတယ်။ ဒါကြောင့် အရမ်းစိတ်ဝင်စားတယ်”ဟု ကေအိုင်စီသို့ ပြောသည်။
ဒီကေဘီအေ၏ မေလ ၁ရက်နေ့ သတင်းစာရှင်းလင်းပွဲအပြီး နောက်ပိုင်းတွင် မြ၀တီမြို့နယ်အတွင်းရှိ ဒီကေဘီအေ အခြေစိုက်ရာ ဖလူး၊ ဝေါ်လေ၊ သေ့ဘောဘိုး၊ မေတ္တာလင်းမြိုင်နှင့် ကော်သူးမွဲခီး(ဆုံဆည်းမြိုင်) နယ်စပ်ဒေသတလျှောက်တွင် ထိုင်းဘက်မှ စတင် တပ်လှန့် ထားသော်လည်း ဒီကေဘီအေဘက်မှ တပ်ချထားခြင်း မရှိဟု KKO ဘက်က ပြောဆိုသည်။

(ဆက်ဖတ်ရန်...................)

ဖတ်ပြီးပြန်ခေါက်သိမ်းပေးခဲ့ပါ...

စစ်မှန်သည့် ငြိမ်းချမ်းရေးအတွက် တပ်မတော်ကဏ္ဍ အရေးပါကြောင်း KNU ပြော

မြန်မာအစိုးရ လုပ်ဆောင်နေသည့် ငြိမ်းချမ်းရေး လုပ်ငန်းစဉ်များတွင် တပ်မတော်၏ အခန်းကဏ္ဍ အရေးပါကြောင်း ကရင်အမျိုးသား အစည်းအရုံး KNU က ပြောဆို လိုက်သည်။“အစိုးရရဲ့ လုပ်ဆောင်ချက်ပေ့ါလေ။

 မြန်မာပြည်မှာ စစ်မှန်တဲ့ ငြိမ်းချမ်းရေးကို အကောင် အထည် ဖော်မယ်ဆိုရင် တပ်မတော်ရဲ့ အခန်းကဏ္ဍက အများကြီး အရေးပါတယ်။ တပ်မတော်က ဒီငြိမ်းချမ်းရေး ဖော်ဆောင်မှု လုပ်ငန်းစဉ်တွေမှာ မားမားမတ်မတ် ရပ်တည်ပြီး တော့ ပါလာမှပဲ ကျမတို့ လုပ်ငန်းတွေက အနှစ်သာရ ရှိမယ်ဆိုတာကို ကျမတို့ အမြဲတန်း ပြောတယ်။”ဟု အဖွဲ့ ပြောခွင့်ရပုဂ္ဂိုလ် နော်မေဦးက ပြောသည်။

 KNU နှင့် အစိုးရ၏ ငြိမ်းချမ်းရေး လုပ်ငန်းစဉ်အပါအ၀င် ရှေ့ဆက် လုပ်ငန်းများနှင့် ပတ်သက်သည့် သတင်းစာ ရှင်းလင်းပွဲ တရပ်အား ထိုင်းနိုင်ငံ ဘန်ကောက်မြို့ရှိ FCCT နိုင်ငံခြား သတင်းထောက်များ အသင်း၌ ယနေ့ည (၈) နာရီတွင် ပြုလုပ်ရန် ရှိပြီး ယင်းဆွေးနွေးပွဲ မတိုင်မီ ယခုလို ပြောဆိုလိုက်ခြင်း ဖြစ်သည်။ ထို့အပြင် အစိုးရ၏ ပြည်ထောင်စုအဆင့် ငြိမ်းချမ်းရေး ဖော်ဆောင်ရေးအဖွဲ့သစ်အား ဧပြီလ (၃၀) ရက်နေ့က ဖွဲ့စည်းလိုက်သည့်အပေါ် ကောင်းသည့် ခြေလှမ်း တရပ်အဖြစ် ကြိုဆိုလိုက်ပြီး လုပ်ငန်း အောင်မြင်စေရန် နှစ်ဖက် ဆွေးနွေးချက်များက အဓိကဖြစ်သည် ဟုလည်းဆိုသည်။

 တနိုင်ငံလုံး အတိုင်းအတာနှင့် အပစ်အခတ်ရပ်စဲရေး ပြုလုပ်ရန် KNU အပါအ၀င် အခြား လက်နက်ကိုင် တိုင်းရင်းသား တပ်ဖွဲ့များက အစိုးရထံ တောင်းဆိုထားပြီး လက်ရှိ ကချင်ပြည် လွတ်လပ်ရေး တပ်မတော် KIA နှင့် အစိုးရတပ်တို့ ဖြစ်ပွားနေသည့် တိုက်ပွဲများ ရပ်ဆိုင်းသင့်သည်ဟုလည်း နော်မေဦးက ပြောသည်။ ကျမတို့ အားလုံး နားလည်ထား တာက မြန်မာပြည်မှာ တကယ်စစ်မှန်တဲ့ ငြိမ်းချမ်းရေးကို အကောင်အထည် ဖော်မယ်ဆိုရင် မြန်မာပြည် ဘယ်ဒေသမှာမှ စစ်ဖြစ်နေလို့ မရဘူး။ နည်းနည်းပဲ ဖြစ်ဖြစ်၊ သေးသေးပဲ ဖြစ်ဖြစ်၊ ကြီးကြီးပဲ ဖြစ်ဖြစ် မြန်မာပြည်ရဲ့ တစိတ် တဒေသမှာ စစ်ဖြစ်နေတယ်ဆိုရင် မြန်မာပြည်မှာ စစ်ဖြစ်တာပဲ။ ကျမတို့ အဲလိုပဲ ယူဆတယ်။” ထို့အပြင် KNU အနေဖြင့် အပစ်အခတ် ရပ်စဲရေး ပြုလုပ်ရုံနှင့် ငြိမ်းချမ်းရေး ရပြီဟု မယူဆနိုင် သေးသလို ကျန်ရှိနေသည့် လုပ်ငန်းများအား အကောင်အထည်ဖော် ဆောင်ရွက်နိုင်ရန် အစိုးရနှင့် ထပ်မံ ဆွေးနွေးသွားမည်ဟုလည်း ဆိုသည်။

 သို့သော် ဆွေးနွေးမည့် နေ့ရက် မသတ်မှတ်ရ သေးကြောင်း ၎င်းက ဆက်ပြောသည်။ ကရင် အမျိုးသား အစည်းအရုံး KNU သည် မြန်မာအစိုးရအား နှစ်ပေါင်း (၆၀) ကျော် လက်နက်ကိုင် တိုက်ပွဲ ၀င်ခဲ့ရာမှ ယခုနှစ် ဇနန္န၀ါရီလက ပထမဆုံးအကြိမ်အဖြစ် ပဏာမအဆင့် အပစ်အခတ် ရပ်စဲရေး လက်မှတ်ရေးထိုးခဲ့သည်။ ထို့အပြင် ရထားပို့ဆောင်ရေးဝန်ကြီးဌာန ပြည်ထောင်စုဝန်ကြီး ဦးအောင်မင်း ခေါင်းဆောင်သည့် အဖွဲ့နှင့် ပြည်ထောင်စု အဆင့် တွေ့ဆုံဆွေးနွေးရေးကို ဧပြီလ (၆) ရက်နေ့က ရန်ကုန်မြို့ ဆီဒိုးနား ဟော်တယ်တွင် ပြုလုပ်ခဲ့ပြီး အဓိက ပြည်သူလူထုနှင့် သက်ဆိုင်သည့် အချက်(၆) ချက်အား လက်တွေ့ အကောင်အထည်ဖော် ဆောင်ရွက်ရန် ဆွေးနွေးခဲ့သည်။ http://www.nmg-news.com/bur/index.php?option=com_content&view=article&id=435&catid=5&Itemid=12

(ဆက်ဖတ်ရန်...................)

ဖတ်ပြီးပြန်ခေါက်သိမ်းပေးခဲ့ပါ...